ХҮҮХДИЙН ЭРХИЙГ ХАМГААЛАХ ӨДРИЙГ АРХИГҮЙ ТЭМДЭГЛЭХ УРИАЛГА ГАРГАЛАА

Дүүргийн удирдах ажилтнуудын ээлжит шуурхай зөвлөгөөн өнөөдөр /05.28/ 08 цагт ЗДТГ-ын хуралдааны танхимд боллоо. 
Шуурхай зөвлөгөөний эхэнд ЗДТГ-ын мэргэжилтэн Г.Одонтуяа өнгөрсөн 14 хоногт өгсөн үүрэг даалгаврын биелэлт болон албан тушаалтнуудын оролцоо, биелэлт ирүүлсэн бүртгэлийг танилцууллаа.

Дүүргийн Засаг даргаас өгсөн үүрэг даалгаврын дагуу нийтийн эзэмшлийн гудамж талбайн цэвэрлэгээ үйлчилгээ, ногоон байгууламжийн усалааг хуваарийн дагуу тогтмол хийж хэрэгжүүлж байна.
Дүүргийн Засаг даргын захирамжийн дагуу 03 сарын 01-ний өдрөөс 05 сарын 31-ний өдрийг хүртэлх хугацаанд “Хоггүй Налайх” аян хэрэгжүүлж, энэ хугацаанд 6 удаагийн бүх нийтийн их цэвэрлэгээг зохион байгуулжээ.
Нийслэлийн нутаг дэвсгэрт хашаа, хайс барих, ашиглах, буулгах журам”-ын дагуу төлөвлөгөө гарган ажиллаж байна. Дүүргийн 2 дугаар хороонд нийслэлийн хөрөнгө оруулалтаар хийгдэж байгаа 1,7 км авто замын трасст орсон 12 гражийг буулгаж, зам дагуух гудамжны 4 айлын хашааг татуулжээ.

Дараагаар нь шуурхай зөвлөгөөнд Цагдаагийн хэлтэс, Онцгой байдлын хэлтэс, Эрүүл мэндийн төвөөс цаг үеийн нөхцөл байдлын талаар мэдээлэл хийлээ. 
Өнгөрсөн 14 хоногт Эрүүл мэндийн төвд амбулаториар 3802 хүн үзүүлсэн бол 292 хүн хэвтэн эмчлүүлсэн байна. Мөн 26 хүүхэд шинээр мэндэлсэн гэж Эрүүл мэндийн төвийн дарга Л.Байгал танилцууллаа.
Онцгой байдлын хэлтсээс гамшиг ослын 1, гал түймрийн 4 удаагийн дуудлагаар гарч ажиллажээ. Цагдаагийн хэлтсийн дарга Г.Сумьяа өнгөрсөн 14 хоногийн хэрэг зөрчлийн талаар танилцуулж, сүүлийн үед ахуйн хүрээний архидалт нэмэгдэх хандлагатай байна гэв. 
Тус мэдээлэлтэй холбогдуулан дүүргийн Засаг дарга Ч.Раднаабазар Хүүхдийн эрхийг хамгаалах өдрийг архигүй болгох уриалга гаргалаа. Үүний тулд 05 сарын 31-ний өдөр ч мөн архигүй болгох хэрэгтэйг санууллаа.

Шуурхай зөвлөгөөний төгсгөлд дүүргийн Засаг дарга Ч.Раднаабазар хэд хэдэн үүрэг даалгавар өглөө. 
”Олон улсын хүүхдийн эрхийг хамгаалах өдөр”-ийг зохион байгуулах бэлтгэл ажлыг сайтар хангах, баярын үйл ажиллагаанд бүх байгууллага идэвхтэй оролцох, 
• Хороод өөрсдийн нутаг дэвсгэртээ баярын арга хэмжээ зохион байгуулах. 
• Иргэд, олон нийтийн амгалан тайван байдлыг хангах, гэмт хэрэг зөрчлөөс урьдчилан сэргийлэх, хэв журмыг сахиулах. 
• Замын хөдөлгөөний аюулгүй байдлыг сайтар хангах. 
• Авто машины зогсоолуудыг нээлттэй байлгах. 
• Хүнсний бүтээгдэхүүний аюулгүй байдалд хяналт тавих. 
• Эцэг, эхчүүд хүүхдүүдээ гэнэтийн осол эндэгдэлд өртөхөөс урьдчилан сэргийлэх зөвлөмжийг хүргэхийг онцгойлон анхааруулсан юм.
Мөн хороодын Засаг дарга нарыг хорооны нутаг дэвсгэрээр тойрч, хүүхдийн тоглоомын талбай, орчны аюулгүй байдлыг шалгах, хяналт тавьж ажиллахыг үүрэг болголоо.